{ سبآت ..!
New Member
انا السما اللي في فضاها / نشا الغيم
............................. لابد تطلع / من غيومي عجاجه
مااشره على رجلٍ / لبس غطوة الريم
.............................. اشره على ريمٍ .. تدس الدجاجه
ياما بوسط الحبس .. نااسٍ .. مظاليم
......................... هذا المثل : واجد يهمه .. رواجه
اهل الفشل / تعزف لحنها من الضيم
.......................... على وتر ميل الزمن / وانعواجه
المرجله ماهي .. تصنّع وترهـــــــيم
.................... ولاهي على كيف / الرجل أو مزاجه
والطيب ريشه / والمواقف تقاسيم
............................ ماهي بكثر اللعلعه / واللجاجه
والشعر وهبه / ماخبرناه تعليم
........................ ولافاد ابن زيدون / وابن خفاجه
الكل راحل مابنا .. واحد امقيــــم
................... ومصيرنا يوم الحساب / نتواجــــــه
الله وامان الله ومن غير تحريم
........................... اني فلا اْغلى شخص منشان حاجه
واذا بدت لي حاجةٍ دون / تعتيم
........................... آخذ قراح الما .. واخلي هــــــماجه
بنات فكري وضح .. ماهن مجاهيم
........................... ماساقهن راع / الحراج لحراجه
ماحتاج افهّم شخص يحتاج تفهيم
....................... ومن يفتهم صمتي / كفيل بعلاجـــه
لاصرت اصلي بالسفر / جَمْـع تقديم
.......................... اللي جـِمـَـع تأخير ... ليه انزعاجه
لو كل احد عنده / عن الموت تقويم
.......................... ماكان نسمع .. ( مات ليلة زواجه )
من ( قيم أوفر ) مابقا للعتب .. قيم
.......................... رح والجمل / ماثقـّــلته الحداجـــــه
لزوم من يخطي / عليه الملازيم
........................... هذي هي .. بذوره .. وهذا .. نتاجه
ماللمعزب .. من طعون .. المعازيم
......................... ياكود .. يبلعــــها .. ويطلق حجاجه
ماكل براق ٍ لمع ... بالسما / ديم
.............................. نوبات ما تمطر .. بليا .. عجاجه
